Urdu

علم وہ ہے جو انسان کو انسان بنائے، نہ کہ وہ جو اسے مشین بنا دے ڈاکٹر اسداللہ خان زندگی میں کبھی کبھی ایسا ہوتا ہے کہ آپ کوئی تحریر ہاتھ میں لیتے ہیں اور پڑھتے پڑھتے اچانک رک جاتے ہیں۔ قلم نیچے رکھ دیتے ہیں۔ آنکھیں بند کر لیتے ہیں۔ اور دل کے کسی گہرے گوشے سے ایک آواز آتی ہے کہ یہی تو میں کہہ رہاتھا۔ ہوا یوں کہ آج کے ٹائمز آف انڈیا میں این سی ای آر ٹی کے ڈائریکٹر، پروفیسر دنیش پرساد سکلانی کا مضمون پڑھا تو یوں محسوس ہوا جیسے میرے دل و دماغ میں مدتوں سے گردش کرنے والے خیالات کو کسی اور نے لفظوں کے قالب میں ڈھال دیا ہو۔ ہر سطر، ہر استدلال اور ہر سوال میرے اپنے فکری سفر کی بازگشت معلوم ہوا۔ ایسا لگا گویا میرے لاشعور میں پوشیدہ تصورات، میرے دل کی دھڑکنوں اور میرے تعلیمی فلسفے کو صفحۂ قرطاس پر منتقل کر دیا گیا ہو۔ میں نے مضمون نہیں پڑھا، بلکہ اپنے ہی خیالات کو ایک نئے قلم سے لکھا ہوا پایا۔ مجھے میر کا وہ مصرع یاد آ گیا جو اردو شاعری کی سب سے لطیف نفسیاتی دریافتوں میں سے ایک ہے “میں نے یہ جانا کہ گویا یہ بھی میرے دل میں ہے”۔ یہ مصرع محض ایک شعری تجربے کا بیان نہیں — یہ اس کیفیت کا نام ہے جب کوئی بات آپ کے اندر اتنی گہری اتر چکی ہو کہ آپ اسے اپنی سمجھتے ہی نہیں، اور پھر جب کوئی دوسرا انسان وہی بات کہہ دے تو آپ چونک اٹھتے ہیں۔ وہ لکھتے ہیں کہ رَٹّا لگانا کبھی ہندوستان کی روح نہیں رہا۔ کہ اس سرزمین نے نچیکیتا کو پیدا کیا جس نے موت سے سوال کیا، گارگی پیدا کی جس نے برہمنوں کے سردار کو خاموش کیا، کناد پیدا کیا جس نے ایٹم کا تصور دیا، سشروت پیدا کیا جس نے جراحی سکھائی، آریہ بھٹ پیدا کیا جس نے صفر دریافت کیا — اور یہ سب رَٹّے سے نہیں، سوال سے، تجربے سے، مشاہدے سے، دلیل سے پیدا ہوئے۔ اور کہ پھر ایک نوآبادیاتی طوفان آیا اور اس نے اس روایت کو چھین لیا۔ علم کی جگہ ملازمت نے لے لی۔ سوال کی جگہ رَٹّے نے لے لی۔ تحقیق کی جگہ تقلید نے لے لی۔ یہ پڑھ کر میں نے سوچا — کیا یہ صرف تعلیم کی کہانی ہے؟ نہیں۔ یہ ہماری پوری تہذیبی روح کی کہانی ہے۔ اگر آج نچیکیتا کسی اسکول میں داخل ہو جائے تو کیا ہوگا؟ وہی نچیکیتا جس نے موت کے دیوتا یمراج کے دروازے پر تین دن اور تین رات کھڑے رہ کر علم طلب کیا تھا۔ وہی نچیکیتا جس کے سوالوں نے کٹھ اُپنشد کو جنم دیا اور جس کی جستجو نے آنے والی نسلوں کے لیے فکر کا ایک لافانی سرچشمہ کھول دیا۔ وہ بچہ جو موت سے نہ ڈرا، کیا وہ ہمارے نصاب کی تنگ گلیوں میں سانس لے پاتا؟ کیا آج کا استاد اس کی حوصلہ افزائی کرتا؟ کیا آج کے اسکول میں اس کے لیے کوئی جگہ ہوتی؟ یا اسے یہ کہہ کر خاموش کرا دیا جاتا کہ یہ سوال نصاب میں نہیں ہے، امتحان میں نہیں آئے گا، وقت ضائع مت کرو۔ یہ سوال محض ایک فرضی تصور نہیں۔ یہ ہمارے پورے نظامِ تعلیم کے لیے ایک بے رحم آئینہ ہے جس میں ہم اپنی خامیاں دیکھنے سے ڈرتے ہیں۔ کیونکہ اصل مسئلہ یہ نہیں کہ ہمارے بچے کیا پڑھ رہے ہیں۔ اصل اور بنیادی مسئلہ یہ ہے کہ ہم انہیں سوچنے دے رہے ہیں یا نہیں۔ جب ہم ہندوستانی علمی روایت کی گہرائیوں میں اترتے ہیں تو ایک انوکھا اور فخر انگیز منظر سامنے آتا ہے۔ یہاں علم کبھی بھی ایک مُردہ معلومات کا ذخیرہ نہیں رہا۔ یہاں سوال عبادت تھا، مکالمہ تعلیم تھا، تلاشِ حقیقت زندگی کا مقصد تھی۔ اُپنشدوں کے عظیم مباحثے دیکھیے — جہاں استاد شاگرد کو جواب نہیں دیتا تھا، بلکہ سوال پوچھتا تھا۔ گارگی اور یاجنوالکیہ کے درمیان وہ تاریخی فکری مناظرہ دیکھیے جس میں ایک خاتون نے براہمنوں کے سردار کو ایسے سوالوں سے جھنجھوڑا کہ وہ خاموش ہو گئے۔ آچاریہ کناد کے ایٹم کے تصور کو دیکھیے جو آج کی جدید طبیعیات کا پیشرو تھا۔ آریہ بھٹ کے ریاضیاتی انکشافات دیکھیے جو اپنے عہد سے صدیوں آگے تھے۔ نالندہ اور تکشیلا کی مہان درسگاہوں کو دیکھیے جہاں دنیا کے کونے کونے سے طالبِ علم آتے تھے — نہ ڈگری کے لیے، بلکہ علم کی پیاس بجھانے کے لیے۔ نالندہ میں دس ہزار سے زائد طالبِ علم اور دو ہزار اساتذہ تھے۔ وہاں کا کتب خانہ اتنا عظیم تھا کہ جب اسے جلایا گیا تو وہ تین ماہ تک جلتا رہا۔ یہ صرف عمارتیں نہیں تھیں — یہ ایک تہذیبی دماغ تھا، ایک زندہ روح تھی جو ہزاروں انسانوں کی فکر سے مل کر بنی تھی۔ ہمارے آباء نے کتابوں کو مقدس ضرور سمجھا، مگر سوچنے کے دروازے کبھی بند نہیں کیے۔ وہ جانتے تھے کہ بند دروازے والا ذہن علم کا نہیں، خوف کا گھر بنتا ہے۔ پھر ایسا کیا ہوا؟ یہ وہ سوال ہے جو ہر محب تعلیم کی نیند اڑا دیتا ہے۔ ایسا کیا ہوا کہ سوال کرنے والی قوم رَٹّا کرنے والی قوم بن گئی؟ ایسا کیا ہوا کہ تحقیق کی جگہ تقلید نے لے لی؟ ایسا کیا ہوا کہ فہم کی جگہ نمبروں نے اور علم کی جگہ سرٹیفکیٹ نے لے لی؟ اس سوال کا جواب ہمیں نوآبادیاتی تاریخ کے تاریک اوراق میں ملتا ہے۔ ۱۸۳۵ء میں جب لارڈ میکالے نے اپنا وہ بدنامِ زمانہ منٹ لکھا تو اس نے صرف ایک نصاب نہیں بدلا — اس نے ایک پوری قوم کے سوچنے کا انداز بدل دیا۔ آہستہ آہستہ تعلیم زندگی کی تیاری کے بجائے امتحان کی تیاری بن گئی۔ اسکول شخصیت سازی کے مراکز کے بجائے امتحانی کارخانے بن گئے۔ اور استاد — علم کا وہ چراغ جو تاریکیوں میں روشنی دیتا تھا — نصاب مکمل کرنے والا ملازم بنتا گیا۔ ۱۹۴۷ء میں ہم نے سیاسی آزادی حاصل کی لیکن ذہنی آزادی؟ وہ ابھی بھی نوآبادیاتی زنجیروں میں جکڑی ہوئی تھی۔ ہم نے عمارتیں بدل دیں، پرچم بدل دیا، حکمران بدل دیے مگر تعلیم کا وہ نوآبادیاتی

ڈاکٹر اسد اللہ خان کچھ دن پہلے پوری دنیا سورج گرہن کو دیکھنے کے لیے بے تاب تھی۔ لوگ حفاظتی چشمے خرید رہے تھے، دوربینیں لگا رہے تھے اور آسمان کی طرف نظریں اٹھائے اس نادر فلکیاتی منظر کا انتظار کر رہے تھے۔ لیکن افسوس… ہم آسمان پر چھانے والے چند لمحوں کے اندھیرے کو تو دیکھ لیتے ہیں، مگر اپنے دلوں، اپنے معاشرے اور اپنی تہذیب پر چھا جانے والے دائمی اندھیرے کو محسوس نہیں کرتے۔ سورج پر لگنے والا گرہن چند منٹوں میں ختم ہو جاتا ہے، مگر انسان کے ضمیر پر لگنے والا گرہن نسلوں تک باقی رہتا ہے۔ ممبئی کی لوکل ٹرین میں پیش آنے والا مینک لوہار کا المناک قتل اسی اندرونی گرہن کی ایک خوفناک علامت ہے۔ یہ صرف ایک نوجوان کی موت نہیں، یہ ہماری اجتماعی بے حسی، ہمارے بکھرتے ہوئے سماجی رشتوں اور مرتی ہوئی تہذیب کا نوحہ ہے۔ ممبئی لوکل… صرف ٹرین نہیں، پورے شہر کا دل ہے ممبئی کی لوکل ٹرین کو لوگ محض ایک ٹرانسپورٹ سسٹم سمجھتے ہیں، لیکن حقیقت میں یہ شہر کی شہ رگ ہے۔ یہ روزانہ لاکھوں خوابوں کو اپنے ساتھ لے کر چلتی ہے۔ کوئی مزدور اپنے بچوں کی روٹی کے لیے سفر کر رہا ہوتا ہے، کوئی طالب علم اپنے مستقبل کی تلاش میں نکلتا ہے، کوئی ماں اپنے بیمار بچے کے علاج کے لیے جا رہی ہوتی ہے، اور کوئی نوجوان اپنی پہلی ملازمت کے خواب سجا رہا ہوتا ہے۔ کوئی نوجوان اپنی پہلی تنخواہ کے خواب سجاتا ہے۔ان ہی ڈبوں میں کتنی دعائیں سفر کرتی ہیں، کتنی امیدیں بیٹھتی ہیں، کتنے منصوبے جنم لیتے ہیں۔ یہ ٹرین صرف جسموں کو نہیں بلکہ امیدوں، خوابوں، ذمہ داریوں اور مستقبل کو ایک اسٹیشن سے دوسرے اسٹیشن تک پہنچاتی ہے۔ مگر جب اسی ٹرین کے اندر خون بہنے لگے، تو سمجھ لیجیے کہ صرف ایک مسافر نہیں مرا، بلکہ پورا معاشرہ زخمی ہوا ہے۔ صرف ایک جملہ… ایک درخوست اور ایک زندگی ہمیشہ کے لئے خاموش کر دی گئی۔ منگل، ۲۳ جون کی وہ رات بظاہر ہر رات کی طرح معمول کی تھی۔ چرچ گیٹ سے نالاسوپارا جانے والی فاسٹ لوکل اپنی رفتار سے دوڑ رہی تھی۔ فرسٹ کلاس کوچ میں عام دنوں کی طرح لوگ بیٹھے تھے؛ کسی کے کانوں میں ائیر فون تھے، کوئی موبائل پر مصروف تھا، اور کوئی تھکن سے اونگھ رہا تھا۔ اسی دوران بائیس سالہ مینک لوہار نے صرف اتنی سی گزارش کی کہ دروازہ بند کر دیا جائے۔ سوچیے… صرف ایک جملہ۔ صرف ایک گزارش۔ “براہِ کرم دروازہ بند کر دیجیے۔” کیا کسی مہذب معاشرے میں یہ جملہ موت کی سزا بن سکتا ہے؟ لیکن ممبئی کی اس لوکل ٹرین میں ایسا ہی ہوا۔ یہ ایک معمولی درخواست تھی، لیکن سامنے کھڑا شخص ۳۰ سالہ، ممبئی ائیر پورٹ کے کارگو سیکشن میں کام کرنے والا روشن سورنا، معمولی ذہنی کیفیت میں نہیں تھا۔ اس کے اندر شاید برسوں کا غصہ، ناکامیاں، مایوسیاں، شراب کا نشہ، اور انا کا زہر جمع تھا۔ ایک لمحے میں چاقو نکلا، چند سیکنڈ میں کئی وار ہوئے، اور ایک ہنستا کھیلتا نوجوان ہمیشہ کے لیے خاموش ہو گیا۔ ایک بائیس سالہ نوجوان، جس کے والدین نے شاید صبح اسے دعاؤں کے ساتھ گھر سے رخصت کیا ہوگا، جس کی ماں نے شام کو اس کے پسندیدہ کھانے کا سوچا ہوگا، جس کے خواب ابھی حقیقت بننے ہی والے تھے… چند لمحوں میں خون میں نہلا دیا گیا۔ قاتل صرف ایک شخص نہیں تھا…؟ اخبارات لکھیں گے کہ قاتل فلاں شخص تھا، پولیس چارج شیٹ داخل کرے گی، اور عدالت سزا سنائے گی۔ لیکن اگر ہم صرف اتنا سمجھ کر مطمئن ہو جائیں تو شاید ہم اصل مجرم کو کبھی نہ پہچان سکیں۔ سوال یہ ہے کہ اس بوگی میں بیٹھے ہوئے درجنوں مسافر کیا کر رہے تھے؟ کیا ان میں سے کوئی ایک شخص بھی آگے نہیں بڑھ سکتا تھا؟ کیا چار پانچ افراد مل کر قاتل کو قابو نہیں کر سکتے تھے؟ یا پھر ہم اس مقام پر پہنچ چکے ہیں جہاں انسان صرف اپنی جان بچانے کا نام ہے؟ یہ خاموش تماشائی کون تھے؟ ہم… آپ… ہم سب۔ قاتل صرف ایک شخص تھا… یا ہم سب؟ پولیس اپنی کارروائی مکمل کر لے گی۔ تب شاید عدالت قاتل کو سزا دے۔ اور پھر اخبارات نئی سرخیاں تلاش کر لیں گے۔ لیکن ایک سوال شاید کبھی ختم نہ ہو۔ جب مینک زمین پر گرا تھا… جب اس پر وار ہو رہے تھے… جب وہ زندگی اور موت کے درمیان آخری سانسیں لے رہا تھا… تب اس بوگی میں بیٹھے ہوئے درجنوں لوگ کیا کر رہے تھے؟ کیا ان کے ہاتھ باندھ دیے گئے تھے؟ کیا ان کی زبانیں گونگی ہو گئی تھیں؟ یا پھر ان کے دلوں سے انسانیت رخصت ہو چکی تھی؟ یہ سوال صرف ان مسافروں سے نہیں… یہ سوال ہم سب سے ہے۔ ہم کب اتنے بے بس، اتنے خوف زدہ اور اتنے خود غرض ہو گئے کہ ایک انسان کو مرتا دیکھ کر بھی خاموش بیٹھے رہے؟ یہی وہ لمحہ تھا جب ایک شخص نے چاقو چلایا، مگر درحقیقت پورا معاشرہ خاموش کھڑا رہا۔ دنیا میں سب سے خطرناک آواز گولی کی نہیں ہوتی… سب سے خطرناک آواز اچھے لوگوں کی خاموشی کی ہوتی ہے۔ اب ہمیں انسانوں سے نہیں، ان کے غصے سے ڈر لگتا ہے آج اگر کوئی شخص ٹرین میں بلند آواز میں موبائل چلا رہا ہو… اگر کوئی بدتمیزی کر رہا ہو… اگر کوئی دوسروں کو تکلیف پہنچا رہا ہو… تو اکثر لوگ خاموش رہتے ہیں۔ اس لیے نہیں کہ وہ غلط کو صحیح سمجھتے ہیں۔ بلکہ اس لیے کہ اب ہمیں قانون سے زیادہ انسانوں کے اندر چھپے ہوئے غصے سے خوف آنے لگا ہے۔ ہر شخص سوچتا ہے… “اگر میں نے کچھ کہا تو؟” “اگر سامنے والا ذہنی دباؤ کا شکار ہوا تو؟” “اگر اس کے ہاتھ میں چاقو ہوا تو؟” “اگر کل اخبار میں میری تصویر چھپ گئی تو؟” سوچیے… جس معاشرے میں صحیح بات کہنا جان کا خطرہ بن جائے، وہاں تہذیب زندہ کیسے رہ سکتی ہے؟ یہ خوف صرف ایک فرد کا نہیں، یہ پورے شہر کی نفسیات بن چکا ہے۔ ہم سب کے اندر ایک خاموش جنگ جاری

“جو بھی کرو گے، وہ درست ہوگا!” ایک ماں کا یقین، ایک باپ کے پسینے، ایک استاد کی رہنمائی اور ایک پینٹر بیٹے کے خواب کی لازوال داستان ایک پینٹر کا خواب: میں رنگ کرتا رہا دیواریں دوسروں کی، تاکہ میرا بیٹا رنگ بھر سکے اپنے خوابوں میں۔ یہ محنت کرتا رہا دن رات، تاکہ وہ پڑھ سکے دن رات، اور اس نے محنت کو عبادت بنا دیا۔ انگریزی نہیں آتی تھی، مگر ہمت تھی۔ سرکاری اسکول میں پڑھا، NMMS اسکالرشپ ملی۔ روزانہ 8 گھنٹے محنت، موک ٹیست میں ناکامیاں۔ ایک لمحہ ایسا بھی آیا جب سب کچھ چھوڑنے کا سوچا! تب ماں نے کہا: “جو بھی کرو گے، وہ درست ہوگا!” اور ایک دن — جے ای ای ایڈوانسڈ میں کامیابی! نتیجہ صرف ساگر کا نہیں تھا… یہ ایک والد کا پسینہ تھا، ایک ماں کی دعا تھی، ایک استاد کا اعتماد تھا، ایک سرکاری اسکول کا سہارا تھا، اور ہندوستان کے کروڑوں غریب گھروں کے خواب کا چین جانا تھا۔ محترم والدین! اپنے بچوں کو صرف نصیحتیں نہ دیں بلکہ یقین دیں۔ صرف نتائج نہ پرکھیں، ان کا جذبہ اور اعتماد پیدا کریں۔ یقین رکھیں، اپنے بچوں کو یقین دلائیں کہ وہ بھی بن سکتے ہیں۔ عزیز طلبہ! اگر راستہ مشکل ہے تو آپ ہو منزل بڑی ہے۔ ناکامی رفتار کم کرتی ہے، سفر ختم نہیں کرتی۔ اپنے خوابوں کو پالنے سے مت چھوڑو، ایک دن دنیا تہاری نتائج دیکھے گی۔ مگر اللہ تہاری جدوجہد دیکھ رہا ہے۔ “جو بھی کرو گے، وہ درست ہوکے… بس پڑھائی جاری رکھو!” تحریر: ڈاکٹر اسداللہ خان Asadullahkhanschoolasadullahkhanschool.org

جین زی، تعلیمی نظام اور مستقبل کے خوف کی نفسیات ڈاکٹر اسد اللہ خان کبھی کبھی معاشروں میں آنے والی تبدیلیاں شور مچا کر نہیں آتیں۔ وہ خاموشی سے نسلوں کے رویوں میں اترتی ہیں۔ پھر ایک دن ہمیں محسوس ہوتا ہے کہ دنیا بدل چکی ہے۔ آج دنیا بھر میں ایک عجیب منظر دکھائی دیتا ہے۔ انجینئر کاروبار سیکھ رہا ہے، ڈاکٹر یوٹیوب چینل چلا رہا ہے، استاد آن لائن کورس بیچ رہا ہے، طالب علم شیئر مارکیٹ سمجھ رہا ہے، اور یونیورسٹی سے فارغ ہونے والا نوجوان ملازمت ڈھونڈنے سے پہلے “Passive Income” کے طریقے تلاش کر رہا ہے۔ سوال یہ نہیں کہ ایسا کیوں ہو رہا ہے، اصل سوال یہ ہے کہ آخر ایسی کون سی تبدیلی رونما ہوئی ہے کہ ایک پوری نسل نوکری سے پہلے “Exit Plan” تیار کر رہی ہے؟ ایسا کیوں ہے کہ آج کا نوجوان کسی کمپنی میں داخل ہونے سے پہلے اس دن کے بارے میں سوچ رہا ہے جب وہ کمپنی اسے نکال دے گی؟ آخر وہ کون سا خوف ہے جو اس نسل کے لاشعور میں بیٹھ گیا ہے؟ پچھلی نسلوں کا خواب سادہ تھا۔ پڑھو، اچھی ڈگری حاصل کرو، اچھی نوکری حاصل کرو، گھر بناؤ، بچوں کو پڑھاؤ اور ریٹائر ہو جاؤ۔ یہی کامیابی تھی، یہی استحکام تھا، یہی زندگی کا نقشہ تھا۔ لیکن آج کا نوجوان اس نقشے پر یقین نہیں رکھتا۔ کیوں؟ اس لیے کہ اس نے اپنی آنکھوں سے دیکھا ہے کہ بڑی بڑی ڈگریاں بے روزگاری کی ضمانت بن سکتی ہیں۔ اس نے دیکھا کہ کورونا کی ایک لہر نے کروڑوں ملازمتیں ختم کر دیں۔ اس نے دیکھا کہ مصنوعی ذہانت چند سیکنڈ میں وہ کام کر رہی ہے جو کبھی ہزاروں افراد کیا کرتے تھے۔ اس نے دیکھا کہ کئی برسوں کی وفاداری کے بعد بھی ایک ای میل انسان کو بے روزگار بنا سکتی ہے۔ چنانچہ اس نسل نے ایک نیا سبق سیکھ لیا: “کسی ایک چیز پر انحصار خطرناک ہے۔” لیکن یہاں ایک اور سوال جنم لیتا ہے۔ کیا واقعی مسئلہ صرف روزگار کا ہے، یا مسئلہ اس سے کہیں زیادہ گہرا ہے؟ میرا خیال ہے کہ یہ صرف معاشی بحران نہیں بلکہ تعلیمی بحران بھی ہے۔ کیونکہ ہماری پوری تعلیمی مشینری اب بھی بیسویں صدی کے لیے بچوں کو تیار کر رہی ہے جبکہ دنیا اکیسویں صدی کے تیسرے عشرے میں داخل ہو چکی ہے۔ ہم اب بھی بچوں سے پوچھتے ہیں: “بڑے ہو کر کیا بنو گے؟ ڈاکٹر؟ انجینئر؟ پائلٹ؟ استاد؟ افسر؟” مگر شاید اب سوال بدلنے کا وقت آ گیا ہے۔ آج کا سوال یہ ہونا چاہیے: “تم کون سی صلاحیتیں پیدا کرو گے جو ہر دور میں تمہیں زندہ رکھ سکیں؟” یہاں ہماری تعلیم کی ایک بنیادی کمزوری سامنے آتی ہے۔ ہم بچوں کو امتحان پاس کرنا سکھاتے ہیں، مسائل حل کرنا نہیں۔ ہم انہیں معلومات دیتے ہیں، بصیرت نہیں دیتے۔ ہم انہیں نوکری حاصل کرنا سکھاتے ہیں، مواقع پیدا کرنا نہیں سکھاتے۔ ہم انہیں یادداشت دیتے ہیں، تخلیق نہیں دیتے۔ آج کا نوجوان ایک اہم سوال پوچھ رہا ہے۔ شاید وہ الفاظ میں بیان نہ کر سکے لیکن اس کے اندر یہ سوال مسلسل موجود ہے: “اگر میری ڈگری مجھے تحفظ نہیں دے سکتی تو پھر مجھے کیا چیز محفوظ بنا سکتی ہے؟” اس سوال کا جواب صرف ملازمت نہیں، صرف کاروبار نہیں، صرف سرمایہ کاری نہیں، بلکہ صلاحیتوں کا ایسا مجموعہ ہے جو انسان کو ہر دور میں کارآمد بنا دے۔ Communication Skills، Critical Thinking، Problem Solving، Leadership، Digital Literacy، Entrepreneurship، Character Building اور سب سے بڑھ کر Learning Agility یعنی مسلسل سیکھتے رہنے کی صلاحیت۔ بدقسمتی سے ہمارے بہت سے تعلیمی ادارے اب بھی صرف نصاب مکمل کرنے کو تعلیم سمجھتے ہیں۔ جبکہ آنے والی دنیا میں نصاب سے زیادہ اہم “قابلیت” ہوگی، امتحان سے زیادہ اہم “مہارت” ہوگی اور ڈگری سے زیادہ اہم “Value Creation” ہوگی۔ یہ بھی ایک دلچسپ المیہ ہے کہ Gen Z کو Work-Life Balance کی نسل کہا جاتا ہے، مگر حقیقت یہ ہے کہ شاید یہ نسل اپنے والدین سے زیادہ کام کر رہی ہے۔ دن میں نوکری، رات میں فری لانسنگ، ہفتہ وار کانٹینٹ کری ایشن، سوشل میڈیا نیٹ ورکنگ اور ساتھ میں نئی مہارتیں سیکھنے کی کوشش۔ یہ سب کیوں؟ کیونکہ انہیں کام سے نفرت نہیں، انہیں غیر یقینی مستقبل سے خوف ہے۔ ایک معلم کی حیثیت سے مجھے سب سے زیادہ فکر اس بات کی ہے کہ کہیں ہم نوجوانوں کو صرف آمدنی پیدا کرنے والی مشینیں نہ بنا دیں۔ کیونکہ زندگی صرف مالی آزادی کا نام نہیں، زندگی مقصد کا نام بھی ہے، اخلاق کا نام بھی ہے، خدمت کا نام بھی ہے، کردار کا نام بھی ہے، معاشرے کی تعمیر کا نام بھی ہے۔ اگر تعلیم صرف پیسہ کمانا سکھائے اور انسان بننا نہ سکھائے تو وہ تعلیم نہیں، محض تربیتِ معاش ہے۔ آنے والے زمانے کا سب سے بڑا سوال یہ نہیں ہوگا کہ کون سی ملازمت باقی رہے گی، بلکہ یہ ہوگا کہ کون سا انسان ہر تبدیلی کے باوجود اپنی افادیت برقرار رکھ سکے گا۔ اور یہی وہ مقام ہے جہاں تعلیمی اداروں کو اپنا پورا فلسفہ ازسرِنو ترتیب دینا ہوگا۔ ہمارا مقصد صرف ڈاکٹر، انجینئر، افسر یا تاجر پیدا کرنا نہیں ہونا چاہیے بلکہ ایسے انسان پیدا کرنا ہونا چاہیے جو حالات کے غلام نہ ہوں بلکہ حالات کو بدلنے کی صلاحیت رکھتے ہوں۔ شاید اسی لیے میں سمجھتا ہوں کہ Gen Z نوکریوں کو مسترد نہیں کر رہی۔ وہ کام سے فرار نہیں چاہتی، محنت سے بھی نہیں بھاگ رہی۔ وہ دراصل ایک ایسی دنیا میں زندہ رہنے کا راستہ تلاش کر رہی ہے جہاں کوئی چیز مستقل نہیں رہی۔ اور شاید اس پوری کہانی کا سب سے اہم سبق یہی ہے کہ مستقبل ان لوگوں کا نہیں ہوگا جن کے پاس صرف ڈگریاں ہوں گی، بلکہ ان کا ہوگا جن کے پاس سیکھنے، بدلنے اور نئے راستے بنانے کی صلاحیت ہوگی۔ اور یہی وہ مقام ہے جہاں تعلیم کا اصل سفر شروع ہوتا ہے۔ “زمانہ بدلنے سے پہلے اگر تعلیم نہ بدلے، تو پھر زمانہ تعلیم کو بے معنی بنا دیتا ہے۔” Asadullahkhanschoolasadullahkhanschool.org

جے ای ای ایڈوانسڈ 2026 کے نتائج اور نوجوان نسل کے لیے کامیابی کا منشور ڈاکٹر اسد اللہ خان کچھ نتائج ایسے ہوتے ہیں جو صرف چند طلبہ کی کامیابی کی داستان نہیں سناتے بلکہ پوری نوجوان نسل کے لیے پیغام بن جاتے ہیں۔وہ بتاتے ہیں کہ خواب کیسے پورے ہوتے ہیں، منزلیں کیسے حاصل کی جاتی ہیں اور کن کمزوریوں سے بچ کر انسان اپنی زندگی بدل سکتا ہے۔وہ صرف یہ نہیں بتاتے کہ کون کامیاب ہوا، بلکہ یہ بھی واضح کرتے ہیں کہ کامیابی تک پہنچنے والوں نے کون سی عادتیں اپنائیں، کن مشکلات کا سامنا کیا اور کس طرح اپنی کمزوریوں پر قابو پایا۔ حال ہی میں جے ای ای ایڈوانسڈ 2026 کے نتائج کا اعلان ہوا۔ایک لاکھ اناسی ہزار سے زائد طلبہ اس امتحان میں شریک ہوئے۔ان میں سے تقریباً ستاون ہزار طلبہ کامیاب قرار پائے۔لیکن پورے ملک کی توجہ تین نوجوانوں پر مرکوز ہو گئی۔ شُبھم کمار (AIR-1)، کبیر چھلّر (AIR-2) اور جاتن چاہر (AIR-3)۔ جب ہم ان کی کامیابیوں کے پیچھے جھانکتے ہیں تو ایک حیرت انگیز حقیقت سامنے آتی ہے۔ان میں سے کسی نے کامیابی کا راز غیر معمولی ذہانت کو قرار نہیں دیا۔کسی نے یہ نہیں کہا کہ وہ چوبیس گھنٹے پڑھتے تھے۔ کسی نے شارٹ کٹ، جادوئی فارمولا یا کسی خفیہ تکنیک کا ذکر نہیں کیا۔بلکہ تینوں کی زبان پر تقریباً ایک ہی پیغام تھا، Dedication, Discipline and Consistencyیعنی وابستگی، نظم و ضبط اور مستقل مزاجی۔یہی کامیابی کا اصل نسخہ ہے۔ بہار کے ایک عام گھرانے سے تعلق رکھنے والے شُبھم کمار نے 360 میں سے 330 نمبر حاصل کرکے پورے ہندوستان میں پہلی پوزیشن حاصل کی۔ان کے والد ہارڈویئر کی ایک چھوٹی سی دکان چلاتے ہیں۔ان کے خاندان میں انجینئر بننے کا خواب ابھی پہلی نسل کا خواب تھا۔شُبھم نے ایک ایسی بات کہی جو ہر طالب علم کو زندگی بھر یاد رکھنی چاہیے کہ کامیابی لمبے وقت تک پڑھنے میں نہیں بلکہ مستقل مزاجی اور سیکھنے کے عمل پر اعتماد میں ہے۔یہ جملہ ہمارے پورے تعلیمی نظام کے لیے آئینہ ہے۔ کبیر چھلّر نے 329 نمبر حاصل کیےوہ صرف ایک نمبر سے پہلی پوزیشن سے پیچھے رہ گیالیکن ان کی سوچ انہیں لاکھوں طلبہ سے آگے لے گئی۔اس نے کبھی نمبروں کے پیچھے دوڑنے کی کوشش نہیں کی۔وہ Concepts کو سمجھنے پر توجہ دیتے رہے۔ہر امتحان کے بعد اپنی غلطیوں کا تجزیہ کرتے۔کمزوریوں کی فہرست بناتے اور پھر انہیں دور کرنے پر کام کرتے۔اس نے ثابت کیاکہ کامیاب طلبہ غلطیاں نہیں چھپاتے، بلکہ غلطیوں سے سیکھتے ہیں۔ جتن چاہر نے ساتویں جماعت سے اپنی علمی بنیادیں مضبوط کرنا شروع کر دی تھیں۔اس نے اولمپیاڈز میں حصہ لیا۔سائنس، فلکیات، کیمسٹری اور دیگر علمی سرگرمیوں میں خود کو مصروف رکھا۔پھر ایک مرحلے پر وہ ٹائیفائیڈ کا شکار ہو گئے۔امتحانات چھوٹ گئے۔کلاسیں متاثر ہوئیں۔مگر انہوں نے ہمت نہیں ہاری۔خاندان اور اساتذہ کی حوصلہ افزائی کے ساتھ دوبارہ کھڑے ہوئے اور پورے ہندوستان میں تیسری پوزیشن حاصل کی۔ جتن نے بتایا کہ ناکامی، بیماری یا مشکلات کامیابی کی راہ بند نہیں کرتیں، ہمت ہار دینا کامیابی کی راہ بند کرتا ہے۔ ہمارے طلبہ امتحانات میں کیوں پیچھے رہ جاتے ہیں؟ بطور معلم چالیس سال سے زیادہ عرصے کے تجربے کے بعد میں پورے یقین سے کہہ سکتا ہوں کہ آج کے طلبہ کی سب سے بڑی کمزوری کم ذہانت نہیں ہے۔بلکہ بے مقصد موبائل استعمال، سوشل میڈیا کی لت، غیر منظم مطالعہ، وقت کا زیاں، رٹّے پر انحصار، کمزور مطالعہ عادات، نیند کی کمی ، خود احتسابی کا فقدان، جلد نتائج حاصل کرنے کی خواہش ،یہ وہ خامیاں ہیں جو ذہین ترین طلبہ کو بھی ناکامی کی طرف لے جاتی ہیں۔ اب سوال یہ ہے کہ اگر ہم واقعی اپنی زندگی بدلنا چاہتے ہیں ، بڑی کامیابی حاصل کرنا چاہتے ہیں تو ہم کیا کریں؟ ان ٹاپرس کی باتیں سننے کے بعد یہ سمجھ میں آتا ہے کہ ہمیں کامیابی کے لئے ایک لائحۂ عمل بنانا ہوگا ۔کچھ اصولوں کو اپنی زندگی میں اختیارکرنا ہوگا مثلاً ۱. روزانہ کے اہداف مقرر کریں۔بغیر ہدف کے پڑھائی، بغیر نقشے کے سفر کی طرح ہے۔ ۲-. موبائل کا وقت محدود کریں۔مطالعہ کے دوران موبائل مکمل بند رکھیں۔ ۳-. غلطیوں کی ڈائری بنائیں-ہر امتحان کے بعد اپنی غلطیاں لکھیں۔ٹاپرز یہی کرتے ہیں۔ ۴-. تمامConcepts سمجھیں۔رٹّا وقتی نمبر دلا سکتا ہے۔فہم زندگی بھر کامیابی دیتا ہے۔ ۵. روزانہ Revision کریں۔پڑھنا ضروری ہے۔مگر دہرانا اس سے زیادہ ضروری ہے۔ ۶. اچھی نیند لیں۔نیند ضائع کرنا محنت نہیں بلکہ نقصان ہے۔ ۷-ہلکی جسمانی ورزش کریں۔صحت مند جسم ہی طویل علمی سفر برداشت کر سکتا ہے۔ ۸-اساتذہ سے سوال پوچھیں۔جو طالب علم سوال پوچھنے سے ڈرتا ہے وہ سیکھنے سے بھی محروم رہ جاتا ہے۔ ۸-مستقل مزاجی اپنائیں۔روزانہ دو گھنٹے کی مستقل پڑھائی، دس گھنٹے کی غیر مستقل پڑھائی سے بہتر ہے۔ ۹-خود پر یقین رکھیں۔دنیا آپ پر یقین کرے یا نہ کرے، آپ کو خود پر یقین ہونا چاہیے۔ اس موقع پر والدین سے یہ گذارش کرنا چاہوں گاکہ اپنے بچوں پر صرف نمبروں کا دباؤ نہ ڈالیں۔ان کے اندر سیکھنے کی محبت پیدا کریں۔ان کا موازنہ دوسروں سے نہ کریں۔ان کی محنت کو سراہیں۔ان کی غلطیوں پر رہنمائی کریں۔ان کی کامیابی کے سفر میں ان کے ساتھی بنیں، جج نہیں۔ وہیں اساتذہ سے یہ التجا ہے کہ آپ صرف نصاب مکمل نہ کریں بلکہ طلبہ کے اندر خواب بھی پیدا کریں۔اعتماد پیدا کریں۔سوچنے کی صلاحیت پیدا کریں۔کیونکہ تاریخ نے ثابت کیا ہے کہ ایک عظیم استاد ہزاروں زندگیاں بدل سکتا ہے۔ میرے عزیز طلبہ! یاد رکھو!شُبھم، کبیر اور جتن کسی دوسرے سیارے سے نہیں آئے تھے۔وہ بھی تمہاری طرح عام بچے تھے۔فرق صرف اتنا تھا کہ انہوں نے اپنی عادتوں کو غیر معمولی بنا لیا۔انہوں نے وقت کی قدر کی۔انہوں نے مستقل مزاجی اختیار کی۔انہوں نے اپنی غلطیوں سے سیکھا۔انہوں نے ہمت نہیں ہاری اور یہی چیز انہیں لاکھوں طلبہ سے ممتاز بنا گئی۔آج اگر تم موبائل کے استعمال کو قابو میں لے لو، اپنی توجہ کو محفوظ کر لو، اپنے وقت کی حفاظت کر لو اور روزانہ تھوڑا سا بہتر بننے کا عہد کر لو تو یقین جانو آنے والا ہندوستان تمہارا منتظر ہےکیونکہ کامیابی قسمت کے دروازے پر نہیں ملتی۔کامیابی محنت، نظم و ضبط، مستقل مزاجی

ڈاکٹر اسداللہ خان عصرِ حاضر کا ہندوستان ایک ایسے فکری و تہذیبی موڑ پر کھڑا ہے جہاں مادی ترقی کی چکا چوند تو عروج پر ہے، مگر ہماری اخلاقی اور تعلیمی بنیادیں اندر سے کھوکھلی ہوتی جا رہی ہیں۔ آج جب ہم اپنے تعلیمی گلستان پر نظر ڈالتے ہیں، تو وہاں علم کی خوشبو کے بجائے امتحانات کا دھواں اور مقابلوں کا شور سنائی دیتا ہے۔ تعلیم کی حقیقی روح جو امتحانی پرچوں اور میرٹ لسٹوں کے نیچے دب کر دم توڑ چکی ہے،آج اس کی بازیافت کی پکارنےبے چین کردیا ہے ۔ انسانی تاریخ کے اوراق کو پلٹ کر دیکھیں تو کائنات کے سب سے بڑے معلمِ اعظم پر نازل ہونے والا پہلا الہامی حکم “امتحان دو”نہیں تھا۔ لوحِ محفوظ سے انسانیت کے نام جو پہلا ابدی پیغام اترا، وہ تھا اِقْرَاْ بِاسْمِ رَبِّكَ الَّذِیْ خَلَقَ حکم ہواپڑھیے اپنے رب کے نام سے جس نے پیدا کیا۔اس پہلے آسمانی سبق کا مقصد نمبرات کی دوڑ نہیں بلکہ شعور کی بیداری تھا۔ اس کا اولین حاصل کوئی دنیاوی ملازمت نہیں بلکہ خالق و مخلوق کی معرفت تھا۔ اسلام کی پوری علمی تاریخ اسی محور کے گرد گھومتی ہے۔ جب تک تعلیم ایک عبادت تھی، بغداد، قرطبہ، غرناطہ، سمرقند، بخارا اور دہلی کے مدارس سے ایسے نابغۂ روزگار انسان پیدا ہوتے تھے جو محض ڈگری یافتہ ملازم نہیں، بلکہ کائنات کے اسرا و رموز کو بے نقاب کرنے والے فلاسفر، موجد اور محقق تھے۔ امام غزالیؒ، ابن رشدؒ، ابن خلدونؒ، شاہ ولی اللہؒ اور سر سید احمد خانؒ کی علمی و فکری عظمت کا راز معلومات کے انبار میں نہیں، بلکہ ان کی فکر کی اس وسعت میں تھا جو زندگی اور کائنات کو اپنے دامن میں سمیٹ لیتی تھی۔ مگر افسوس! صدیوں کے اس سفر میں ہم نے اس اصلِ اثاثہ کو کہیں کھو دیا۔ آج کا المیہ یہ ہے کہ گوگل ہماری جیبوں میں تو موجود ہے لیکن حکمت ہمارے دلوں سے رخصت ہو چکی ہے۔ ہمارے پاس معلومات کے انبار ہیں مگر فکری گہرائی کا قحط ہے۔ ہم نے ذہنوں کو اندھا دھند معلومات سے بھرنا تو سیکھ لیا، مگر شخصیتوں کو تراشنا اور کردار کو تعمیر کرنا یکسر بھلا دیا۔ آج کا ہندوستان تعلیمی نظام کے نام پر ایک ایسی کارگاہ میں تبدیل ہو چکا ہے جہاں انسان نہیں، بلکہ “امتحانی جنگجو” (Exam Warriors) تیار کیے جا رہے ہیں۔ حالیہ برسوں میں NEET، JEE، CUET، SSC اور HSC جیسے قومی سطح کے امتحانات کے گرد پیدا ہونے والے پیپر لیک، امتحانی مافیا، رشوت ستانی اور سنگین بدعنوانیوں کے تنازعات نے پورے ملک کو ہلا کر رکھ دیا ہے۔ لیکن المیہ دیکھیے کہ ہمارا سماج اور پالیسی ساز صرف اس نظام کی ظاہری شاخوں پر کلہاڑی چلا رہے ہیں، کوئی بھی اس ناسور کی اصل جڑ تک پہنچنے کی زحمت نہیں کر رہا۔ اصل بحران پیپر لیک ہونا نہیں ہے، بلکہ اصل بحران یہ ہے کہ ہمارا پورا تعلیمی ڈھانچہ اپنی روح سے محروم ہو چکا ہے۔ ہم نے تعلیم کو محض “معلومات کی منتقلی” (Information Transfer) کا نام دے دیا ہے، جبکہ تعلیم تو بنیادی طور پر “انسان سازی” (Human Making) کا ایک مقدس عمل تھا۔ آج ایک معصوم بچے کا پانچ سال کی عمر میں اسکول کی دہلیز پر قدم رکھتے ہی بچپن کا دائرہ تنگ کر دیا جاتا ہے۔ اس کے ناتواں کندھوں پر کتابوں کا بھاری بستہ لاد کر اسے ایک ایسی لامتناہی اور اندھی دوڑ میں دھکیل دیا جاتا ہے جہاں ہر اگلا موڑ پچھلے سے زیادہ بے رحم ہوتا ہے: پری پرائمری سے پرائمری کی دوڑ، پرائمری سے سیکنڈری کی مشقت، سیکنڈری سے جونیئر کالج کا تناؤ، جونیئر کالج سے انٹرنس امتحانات کے عذاب تک اور آخر میں روزگار کی منڈی میں خود کو بیچنے کا مقابلہ ،اس پوری تگ و دو میں اوراس طویل مسافت کے کسی بھی موڑ پرکوئی ہمدرد استاد یا نظامِ تعلیم اس بچے سے یہ نہیں پوچھتاکہ تم کیا سوچتے ہو؟ تمہارے دل کے جذبات کیا ہیں؟ تمہارے انفرادی خواب کیا ہیں؟ اور تم ایک انسان کے طور پر کیسے بن رہے ہو؟ پورا نظامِ حکومت، اسکول اور والدین صرف ایک ہی رٹ لگائے بیٹھے ہیں کہ تمہارے پرسنٹائل کتنے آئے؟ میرٹ لسٹ میں تمہارا رینک کیا ہے؟ یہی وہ تاریک لمحہ ہے جہاں تعلیم سسک سسک کردم توڑ دیتی ہے اور “امتحان” ایک جلاد کی طرح زندہ ہو جاتا ہے۔ یہی وجہ فکرمند اذہان ان امتحانات کو سماجی کنٹرول کا ہتھیارقرار دیتے ہیں ۔ یہ ایک ایسا ہتھیار ہے جو لاکھوں نوجوانوں کی زندگی کے سب سے خوبصورت، تخلیقی اور سنہرے سالوں کو تین گھنٹے کے ایک بے جان پرچے میں قید کر دیتا ہے۔ اس امتحانی جنون کا نتیجہ یہ نکلا ہے کہ ملک میں “کوچنگ انڈسٹری” کے نام سے ایک متوازی اور ظالمانہ تعلیمی سلطنت قائم ہو چکی ہے۔ کروڑوں روپے کے اس کاروبار میں معصوم بچوں کا بچپن فروخت ہو رہا ہے، نوجوانوں کی صلاحیتیں گروی رکھی جا رہی ہیں، اور ان کے اچھوتے خواب اس منڈی میں کوڑیوں کے دام نیلام ہو رہے ہیں۔ پھر جب کوٹا (Kota) جیسے تعلیمی مراکز سے معصوم بچوں کی خودکشیوں کی خبریں آتی ہیں، جب نوجوان نسل شدید ڈپریشن اور ذہنی تناؤ کا شکار ہو کر موت کو گلے لگاتی ہے، تو یہ سماج حیرت کا اظہار کرتا ہے! ہم یہ کیوں بھول جاتے ہیں کہ ہم نے انہیں جینا سکھایا ہی کب تھا؟ ہم نے تو انہیں صرف مقابلہ کرنا سکھایا تھا۔ ہم نے انہیں کامیابی کے طریقے تو رٹائے، مگر زندگی کا حقیقی مطلب نہیں بتایا۔ ہم نے انہیں نوکری کے لیے تو تیار کیا، مگر ایک ذمہ دار شہری اور باوقار انسان بننے کا گر نہیں سکھایا۔ اگر ہم غور و فکر کی آنکھوں سے دیکھیں تو کائنات کی کوئی بھی عظیم تبدیلی رٹّے بازی سے نہیں آئی۔ قرآن کریم کی آیاتِ بینات کا ایک بڑا حصہ انسان کو بار بار تدبر، تفکر اور تعقل کی دعوت دیتا ہے۔ کلامِ الٰہی پکار پکار کر کہتا ہے کہ قرآن کا طالب علم وہ ہے جو اندھی تقلید نہیں کرتا، بلکہ کائنات کا مشاہدہ کرتا ہے، اپنے نفس کو پڑھتا ہے، تاریخ کی نبض پر ہاتھ رکھتا ہے اور سوال پوچھتا ہے۔ اگر تعلیم